25. oktober 2000

UKA 2000/22

 

A l l a n n g u u t i s s a t u t s i u n n e r s u u t

uunga

Imigassanik aalakoornartortalinnik nioqquteqartarneq sassaallertarnerlu pillugit Inatsisartut inatsisissaattut siunnersuut

 

Aappassaaneerinninnermut Naalakkersuisunit saqqummiunneqartoq.

§ 2-mut

1. Imm. 1 ima oqaasertalerneqassaaq:
"Imigassanik aalakoornartortalinnik kimittuunik kimikitsunilluunniit nioqquteqassagaanni sassaalliissagaanniluunniit imigassanik aalakoornartortalinnik nioqquteqarsinnaanermut/sas-saallersinnaanermut akuersissummik pigisaqarnissaq piumasaqaataavoq. Imigassanik aalakoornartortalinnik nioqquteqarsinnaanermut/sassaallersinnaanermut akuersissummik pissarsisinnaassagaanni niuernermik, assassornermik suliffissuarmillu ingerlatsinermik imaluunniit sutorniartarfiutilittut akunnittarfiutilittullu inuussutissarsiummik ingerlataqarsinnaanermut allagartamik akuersissummik pigisaqarnissaq piumasaqaataavoq, tak. Kalaallit Nunaanni namminersorluni inuutissarsiuteqarneq pillugu Inatsisartut inatsisaat imaluunniit Kalaallit Nunaanni neriniartarfinnik akunnittarfinnillu ingerlatsinerit pillugit Inatsisartut inatsisaat, taamaattoq tak. imm. 2."

§ 3-mut

2. Imm. 1 aamma 2 ima oqaasertalerneqassapput:
"Imigassanik aalakoornartortalinnik nioqquteqarsinnaanermut/sassaallersinnaanermut akuersissut kommunimi pineqartumi kommunalbestyrelsimit tunniunneqartassaaq. Najukkani kommunit aggornerisa avataanniittuni imigassanik aalakoornartortalinnik nioqquteqarsinnaanermut/sassaallersinnaanermut akuersissutit naalakkersuisunit tunniunneqartassapput.
Imm. 2. Imigassanik aalakoornartortalinnik nioqquteqarsinnaanermut/sassaallersinnaanermut akuersissummik tunniussinermut atatillugu inuiaqatigiinnut ataqatigiissumik soqutigisat, imernaveersaartitsinerup annertusarneqarnissaanut atorneqarsinnaasut, kommunalbestyrelsip isiginiassavai. Aammattaaq kommunalbestyrelsi immikkut piumasaqaatinik aalajangersaasinnaavoq imernaveersaartitsinerup annertusarneqarnissaannut atorneqarsinnaasunik imaluunniit eqqaamiunut inuiaqatigiinnullu akornutaasunut killilersimaarutissanik."

3. Imm. 7 - 9 ima oqaasertalerneqassapput:
"Imm. 7. Kommunalbestyrelsip akuersissutigisinnaavaa nioqquteqartarneq sassaallertarnerluunniit akuersissummik qinnuteqaatip tunniunneqarneraniilli aallartissinnaasoq. Immikkut akuersissut taamaattoq piffissamut killilimmut akuersissutitut tunniunneqartassaaq, sivisunerpaamik akuersissuterpiaq pillugu kommunalbestyrelsip aalajangiinerata tiguneqarnissaata tungaanut. Akuersissut kimut tunniunneqarnersoq, akuersissut akuersissummut sorlermut tunnganersoq, init suut akuersissummut ilaanersut kiisalu akuersissummut piumasaqaataasut pillugit paasissutissanik imaqassaaq.
Imm. 8. Piffissami akuersissutip atuuffiani suliffeqarfimmut piginnittumulluunniit tunngassuteqartut annertuumik allannguuteqarpata akuersissut kommunalbestyrelsip nutaamik isumaliutigeqqissinnaavaa. Piffissami killilikkami ataavartumilluunniit akuersissutaareersut kommunalbestyrelsip arsaarinnissutigisinnaavai, § 6 naapertorlugu annertuumik imaluunniit arlaleriarluni sumiginnaanerit pineqarpata.
Imm. 9. Imm. 2-miit 8-mut aamma imm. 10-mi aalajangersakkat imigassanik aalakoornartortalinnik nioqquteqarsinnaanermut/sassaallersinnaanermut akuersissutinut naalakkersuisunit tunniunneqartartunut taamatulli atuutsinneqassapput."

§ 8-mut

4. Imm. 1 ima oqaasertalerneqassaaq:
"Ataasiaannartuni peqatigiiffinni katerisimaarnerni katersortarfinni, filmertarfinni ininiluunniit allani kikkunnilluunniit atorneqarsinnaasuni ingerlanneqartuni imigassanik kimittuunik kimikitsunilluunniit akiliuteqartitsilluni sassaallerneq sassaallernermulluunniit assingusumik imigassallerneq aatsaat pisinnaavoq pisut ataasiakkaat tamat sioqqullugit ataasiaannartumik akuersissummik kommunalbestyrelsimit pissarseqqaarluni."

5. Imm. 4 oqaasertalerneqassaaq imatut:
"Imm. 4. Aaqqissuussinerup ataasiaannartumik akuersissummik pissarsiuunneqartup ingerlanneqarnissaa sioqqullugu ataasiaannartumik akuersissutip assilinera kommunalbestyrelsip politiinut nassiutissavaa."

§ 12-imut

6. Imm. 3 ima oqaasertalerneqassaaq:
"Imm. 3. Imm. 1-imi aalajangersagaq aamma sap. akunnerani ulloq suunersoq apeqqutaatinnagit decembarip 23-ani aamma decembarip 30-ani imigassanik kimikitsunik nioqquteqarneq nal. 09.00-imiit nal. 18.00-imut ingerlanneqarsinnaavoq. "

§ 13-imut

7. Imm. 2 ima oqaasertalerneqassaaq:
"Imm. 2. Imm. 1-imi aalajangersagaq apeqqutaatinnagu mittarfiit kioskiini akunnittarfinnullu unnuiffiusunut piffissami nal. 06.00-imiit nal. 12.00-ip tungaanut imigassanik kimittuunik kimikitsunillu sassaallernissamut immikkut akuersissutinik kommunalbestyrelsi tunniussisinnaavoq. Akuersissummi erseqqissumik taaneqassaaq piffissaq nal. 06.00-ip 12.00-illu akornanni akuersissuteqarfiusoq."

8. Kapitali 6-ip kapitalitut qulequtaa ima oqaasertalerneqassaaq:
"Immikkut aalajangersakkat"

§ 19-imut

9. Imm. 2 ima oqaasertalerneqassaaq:
"Imm. 2. Sutorniartarfinni sassaallertarfinnilu imigassanik aalakoornartortalinnik sassaallerfiusuni akuersissummik piginnittuusup isumagissavaa imerneqarsinnaasunik allanik aamma sassaallertoqarnissaanut periarfissaqassasoq, matumani immiaaqqat kimikitsumik aalakoornartortallit viinnillu aalakoornartortaqanngitsut imeruarsaatillu assigiinngitsut ilanngullugit, taamaattoqarneralu erseqqissumik takuneqarsinnaasariaqarpoq akit viinnillu allattorsimaffianni. Aammattaaq imeq sermilik saqqumitinneqassaaq isersimasunit akiliuteqarani pineqarsinnaanngorlugu."

§ 24-mut

10. Imm. 2 ima oqaasertalerneqassaaq:
"Imm. 2. § 3, imm. 2 -mi, oqaaseqatigiit aappaat malillugit akuersissummi allallugit immikkut piumasagaataasinnaasut pillugit Naalakkersuisut maleruagassanik aalajangersaasinnaapput."

§ 27-mut

11. Imm. 1 ima oqaasertalerneqassaaq:
"Imm. 1. § 2-mik unioqqutitsinerit, § 3, imm. 1-imi oqaaseqatigiit aappaat malillugit piumassaqaatitut aalajangersakkanik unioqqutitsinerit, § 3, imm. 5-imik, § 4, imm. 2-mi oqaaseqatigiit pingajuinik, § 4, imm. 4-10-nik unioqqutitsinerit, § 6, imm. 1 malillugu atugassarisatut aalajangersakkanik unioqqutitsinerit, § 7, imm. 1-imik, § 8, imm. 1-imik aamma 2-mik, §§ 9-14-inik, §§-inik 16 aamma 17-imik, § 18, imm. 1-4-nik, § 18, imm. 5-imi oqaaseqatigiinnik siullernik unioqqutitsinerit, § 19, imm. 1 malillugu inerteqqummik unioqqutitsineq, § 19, imm. 2-mi oqaaseqatigiit aappaannnik, § 19, imm. 3-mik, § 20, imm. 1-imi oqaaseqatigiinnik siullernik, §§ 21 aamma 22-mik aammalu § 25-mik unioqqutitsinerit akiliisitsissutaasussanngorlugit eqqartuunneqarsinnaapput. Pissutsit § 6-imi aalajangersakkanik aamma unioqqutitsineruppat imigassanik aalakoornartortalinnik nioqquteqarsinnaanermut/sassaallersinnaanermut akuersissummik arsaarinnittoqarsinnaavoq."

12. Imm. 3 - 5 oqaasertalerneqassapput imatut:
"Imm. 3. Naalakkersuisut piginnaatinneqarput maleruaqqusami, inatsit manna tunngavigalugu aalajangersarneqartumi, aalajangersakkanik unioqqutitsinerit akiliisitaasitsissutiginissaannut, aamma unioqqutitsineq akuersissummik piginnittuusumut imaluunniit sassaalliinermut akisussaasumut piaaraluneernikkut mianersuaalliornikkulluunniit pisuutitsissutaasinnaanngikkaluarpalluunniit. Aammattaaq killilersuinermi pointit arsaarinnissutigineqarsinnaanerat kiisalu arsaarinnissuteqarsinnaaneq pillugit maleruaqqusanik aalajangersaasoqarsinnaavoq.
Imm. 4. Unioqqutitsinernut aktiaateqarluni ingerlatseqatigiiffinnit, piginneqataassuteqarnikkut ingerlatseqatigiiffinnit imaluunniit piginneqatigiiffinnit taakkuluunniit assigisaannit piliarineqartunut ingerlatseqatigiiffik taamaattutut eqqartuunneqarsinnaavoq akiliisitaasussanngorlugu. Unioqqutitsineq Namminersornerullutik Oqartussanit, kommunimit imaluunniit kommunit ataatsimoorlutik suliniaqatigiiffianit, kommunalbestyrelsit nunaqarfinnilu aqutsisut il.il. pillugit inatsisartut inatsisaanni § 64-imi pineqartunut ilaasumit, piliaappat Namminersornerullutik Oqartussat, kommunalbestyrelsi imaluunniit kommunit ataatsimoorlutik suliniaqatigiiffiat eqqartuunneqarsinnaavoq akiliisitaasussanngorlugu.
Imm. 5. Akuersissummik piginnittuusoq aamma suliffimmi imigassanik aalakoornartortalinnik nioqquteqartumi sassaallertartumiluunnniit nioqquteqarnermut sassaallertarnermulluunniit akisussaasuusoq § 18-imik aamma § 19, imm. 1-imik unnioqqutitsinermi eqqartuunneqarsinnaavoq akiliisitaasussanngorlgu."

 

Nalinginnaasumik nassuiaatit

Inatsisissatut siunnersuutaaqqaartup saqqummiunneqarnerata kingornatigut ilaatigut Inatsisartut Inatsisileriffianit paasissutissanik pissarsiniareerneq tunngavigalugu allannguutissatut siunnersuut saqqummiunneqarpoq. Oqaasertaliussat ataasiakkaat allanngortinneqarnerisa saniatigut allannguutissatut siunnersuutip imarai inatsisissatut siunnersuutip siullermeerlugu oqaluuserineqarnerata kingunerisaanik allannguutit.

 

Nassuiaatit

Nr.1-imut

Imarisai allanngortinngikkaluarlugit oqaasertai allanngortinneqarput.

Nr. 2-mut

Imarisai allanngortinngikkaluarlugit oqaasertai allanngortinneqarput.

Nr. 3-mut

Imm. 7-mi allannguut oqaasertaanik allannguineruvoq. Imm. 8-mi aamma 9-mi allannguinertigut kukkusumik innersuussinerit iluarsineqarput.

Nr. 4-mut

Imarisai allanngortinngikkaluarlugit oqaasertai erseqqissarlugit allanngortinneqarput.

Nr. 5-imut

Imarisai allanngortinngikkaluarlugit oqaasertai allanngortinneqarput.

Nr. 6-imut

Allannguut ilanngunneqarpoq kalaallisuuani siullermi kukkuneqarnera pissutigalugu.

Nr. 7-mut

Isumaa ersarinnerulersinniarlugu siunnersuutaaqqaartumi oqaaseqatigiit aappaat peerneqarput.

Nr. 8-mut

Oqaaseqatigiit paasiuminarnerulersinniarlugit allanngortinneqarpoq.

Nr. 9-mut

Immikkoortumi "immiaaqqat aalakoornartortaqanngitsut" taarserneqarpoq "immiaaqqat kimikitsumik aalakoornartortallit", tassa ilisimatitsissutigineqarmat immiaaqqat aalakoornartortaqanngitsut Nuuk Imeq A/S-imit pissarsiarineqarsinnaanngitsut taamaattumillu maqitsiviup nioqquteqarfiini nioqqutigineqaratik.

Nr. 10-mut

Allannguut oqaasertaliorneranik erseqqissaaneruvoq.

Nr. 11-mut

Allannguutikkut aalajangersakkat suut pineqaatissiissuteqarfiusinnaanerat erseqqissarneqarpoq.

Nr. 12-imut

Imm. 3-mi allannguut erseqqissaanerup saniatigut allannguutaavoq inatsit manna tunngavigalugu naalakkersuisut aalajangersagaasigut tunngavissaasut naapertorluarlugit akisussaaffiliinissamut aalajangersakkat aalajangersarneqarsinnaaqqullugit. Kiisalu naalakkersuisut piginnaanilerneqarput inatsit manna tunngavigalugu aalajangersakkatigut arsaarinnissuteqarsinnaaneq pillugu aalajangersakkanik aalajangersaanissamut.

Imm. 4-mi inatsimmik unioqqutitsinermi akiliisitaasussanngorlugit eqqartuunneqarsinnaasut akornanni pisortat oqartussaasut taagorneqarneranni naalagaaffik peerneqarpoq.

Imm. 5-imi allannguut allannguutigineqarpoq inatsisiliornermi tekniki pissutigalugu aammalu pisut killiliiffigineqarlutik immikkoortoq taanna malillugu immikkut pineqaatissiissuteqarfiusinnaasut.